အားလုံးကျန်းမာကြပါရဲ့လား။ အဓိကာရ လူ့အခွင့်အရေးပေါ့ကတ် အတွဲ ၂၊ အပိုင်း ၁၅ ကနေ ပြန်လည်ကြိုဆိုပါတယ်။ ဒီတပတ် လူ့အခွင့်အရေးပေါ့ကတ် အပိုင်း ၁၅ မှာ ဆွေးနွေးဖို့ ရွေးချယ်ထားတဲ့ ခေါင်းစဥ်ကတော့ လူ့အခွင့်အရေးနဲ့ သတင်းစာပညာပဲ ဖြစ်ပါတယ်။ ဒီပေါ့ကတ်မှာ အဓိကာရ လူ့အခွင့်အရေးပေါ့ကတ်ရဲ့ ပုံမှန်မေးမြန်းတင်ဆက်သူ ပိုင်သက်က မေးမြန်းထားပြီး အလွတ်တန်းသတင်းထောက် တဦးဖြစ်တဲ့ နော်ဘတ်တီဟန်က ဆွေးနွေးဖြေကြားထားပါတယ်။ ဒီတပတ် လူ့အခွင့်အရေးနဲ့ သတင်းစာပညာ ဆွေးနွေးချက်ရဲ့ ပထမပိုင်းမှာတော့ လူ့အခွင့်အရေးချိုးဖောက်မှုတွေကို အများပြည်သူအတွက် ဖော်ထုတ်တင်ပြရမှာ သတင်းစာပညာရဲ့ အရေးကြီးတဲ့အခန်းကဏ္ဍ၊ လူ့အခွင့်အရေးချိုးဖောက်မှုတွေကို ရေးသားဖော်ထုတ်တင်ပြရာမှာ သတင်းသမားတွေ ကိုင်စွဲသင့်မယ့် ကျင့်ဝတ်နဲ့ သတင်းမီဒီယာတွေဟာ လူထုရဲ့ အမြင်တွေအပေါ် ဘယ်လောက်ထိ သက်ရောက်မှုရှိနိုင်လဲဆိုတဲ့ အကြောင်းအရာတွေကို ဆွေးနွေးထားပါတယ်။